Sot, është afati i fundit për korrigjimin e të dhënave bankare nga individët përfitues të ndihmës financiare të miratuara për të gjithë ata qytetarë që u prekën në punën e tyre, për shkak të kufizimeve në situatën e krijuar nga COVID-19.
Administrata Tatimore informoi të gjithë individët përfitues të ndihmës financiare sipas paketave 1 dhe 2, të cilët ende nuk e kanë marrë masën e caktuar të përfitimit për shkak të plotësimit në mënyrë të pasaktë të të dhënave të llogarisë bankare (emër banke dhe/ose IBAN), që data 31 gusht 2020 është afati i fundit për të ofruar informacionin e saktë.
“Plotësimi i formularit të të dhënave bankare, është i thjeshtë dhe duhet të kryhet vetëm nga individët, për të cilët ende nuk është kryer korrigjimi i të dhënave nga subjektet punëdhënës. Pas dorëzimit të tij do të vijohet menjëherë me kalimin në mënyrë automatike të masës së përfitimit”, thuhet në një njoftim nga Tatimet.
Administrata Tatimore fton të gjithë individët e interesuar të verifikojnë të dhënat e tyre në listën bashkëngjitur dhe të plotësojnë menjëherë formularin e të dhënave bankare për të mundësuar sa më shpejt kalimin e ndihmës financiare në llogarinë e tyre.
