Partia Socialiste do të mbledhë nesër grupin e saj parlamentar ku pritet të diskutohet mbi zhvillimet e pritshme politike, por edhe ato brenda kësaj partie.
Mbledhja do të mbahet në Elbasan, në mjediset e një prej bizneseve private, ndërsa pritet që deputetët të njihen me udhëzimet e qarta lidhur me ndryshimet e pritshme në Kodin Zgjedhor, përsa i takon implementimit të hapjes së listave të kandidatëve për deputet në masën 100 %.
Ndërkohë që opozita e bashkuar kundërshton ndalimin e koalicioneve parazgjedhore, socialistët duket se do t´i shkojnë deri në fund projektit të tyre për të mos lejuar funksionimin e koalicioneve sipas skemës së deritanishme.
Gjithashtu mësohet se një tjetër pikë e mbledhjes do të jetë caktimi i datës për thirrjen e Asamblesë Kombëtare të PS-së, e cila pritet të realizojë edhe disa ndryshime të rëndësishme në Kryesinë e socialistëve, por edhe strukturën organizative të kësaj partie.
Më parë është raportuar se disa prej emrave të njohur në PS, përfshi këtu edhe ministrin për Diasporën, Pandeli Majko, apo ish-ministrin Fatmir Xhafaj, rrezikojnë zgjedhjen në Kryesinë e PS-së. Gjithashtu një tjetër emër është ai i ish-Kryebashkiakut Vangjush Dako, i cili është përfshirë prej gati 1 viti në listat e zeza të DASH.
Mbledhja e grupit parlamentar socialist duket se do të shënojë edhe fundin e pushimeve për deputetët socialistë, të cilët do t´i duhet të angazhohen me strukturat për të siguruar një vend në listat e ardhshme të deputetëve, ose më saktë në ato që konsiderohen si vende të sigurta.
Nuk përjashtohet mundësia që në mbledhjen e Asamblesë Kombëtare, Kryeministri Rama të njoftojë ndryshimet në Qeveri, kjo bazuar në atë që e konsideron si performanca apo arritjet individuale të çdo ministri, ndërkohë që zgjedhjet parlamentare do të mbahen në prill ose maj.
Asamblea pritet të shënojë edhe atë që mund të quhet si ndezja e motorëve në Partinë Socialiste për fushatën e zgjedhjeve parlamentare të 2021.
