Kryeministri Edi Rama ka përgënjeshtruar akuzat se “po i fal detin Greqisë”. Në një reagim, shefi i ekzekutivit i quan korrekte deklaratat e kryeministrit grek se Greqia “do zgjerohet 12 milje në detin Jon”.
Rama kujton dhe marrëveshjen me Greqinë më herët gjatë qeverisjes së tij, që nuk u konkretizua.
“Rast tipik ‘falja e detit grekut’, ‘marrja e detit nga greku’, ‘ikja e detit tek greku’” që është kthyer si ato këngët e vjetra që ringjallin emocione sa herë na dalin në youtube, pavarësisht se është një sajesë e vjetër tanimë, qyshse negociatat tona me palën greke po materializoheshin në një dokument konkret, bazuar mbi normat ndërkombëtare dhe të drejtën e detit. Deformimi skandaloz që iu bë asokohe një deklarate publike të Ministrit të Jashtëm grek për ‘zgjerimin nga 6 në 12 milje të ujrave detare të Greqisë’ dhe sulmi i orkestruar kundër marrëveshjes së re për detin, ishte tipik rasti i ushqimit të paditurisë si argument me helmin e nacionalizmit. E njëjta deklaratë, krejt korrekte, e kryeministrit Micotaqis këto ditë, po ushqen përsëri padinë si argument tradhëtie të qeverisë sonë”, shkruan Rama.
