Importi i produkteve të higjienës, sapunë dhe detergjetë për shkak të pandemisë COVID-19 shënoi rritje gjatë 7-mujorit të këtij viti, krahasuar me të njëjtën periudhë të vitit 2019.
Të dhënat e publikuara nga Instituti i Statistikave (INSTAT) konfirmojnë se në raport me një vit më parë vërehet një rritje me ritme të larta të importit të produkteve të higjienës, sapunit dhe detergjentit.
Vetëm në muajin mars është shënuar një rënie e lehtë e importit të këtyre produkteve dhe kjo lidhet me masat kufizuese të ndërmarra për shkak të pandemisë, ku u prek edhe sektori i transportit.
Rritja më e lartë vjetore e importit të produkteve të higjienës, sapun dhe detergjentë, u shënua në muajin prill konkretisht 29% .
Ndërsa vërehet një rënie e ritmit të rritjes së këtyre produkteve përgjatë muajit korrik, ku u importuan 6% më shumë produkte krahasuar me korrikun e vitit 2019.
Drejtoria e Përgjithshme e Doganave ka përditësuar deri në fund të muajit qershor të dhënat për tregtinë e jashtme të mallrave.
Referuar këtyre të dhënave importi në vlerë i grupit “sapunë, agjentë me veprim të sipërfaqshëm dhe preparate” llogariten 3,873 milionë lekë. Në të njëjtën periudhë të një viti më parë importet në vlerë të këtij grupi ishin 3,511 milionë lekë.
Në volum, referuar DPD, gjatë periudhës janar-qershor janë importuar 28,811 tonë “sapunë, agjentë me veprim të sipërfaqshëm dhe preparate” nga 25,349 tonë që u importuan në të njëjtën periudhë të 2019-s.
