Nga BoldNews.al
Në Janar 2019, Kryeministri Edi Rama e cilësoi Ardian Iljazi si “drejtori halabak” i Kadastrës së Durrësit. Disa muaj më pas, gjykata e Durrësit vendosi arrestimin e tij, nën dyshimet për afera në tjetërsimin e pronave në zonën e Kepit të Rodonit.
Më pas, gjykata e Apelit i jep lirinë, ndërkohë që Prokuroria e Durrësit vijon ta ketë ende nën hetim, së bashku me persona të tjerë.
E, megjithatë, “halabaku”, “i arrestuari”, tashmë është rikthyer fuqishëm, duke u emëruar Drejtor i rëndësishëm në Bashkinë e Durrësit.
Rikthimi “i fuqishëm”
Bashkia e Durrësit ka njoftuar së fundmi se, pas një konkursi, Ardian Iljazaj është kandidati fitues për pozicionin e Drejtorit të Shërbimeve Publike në këtë institucion.
Pozicioni i drejtuesit të Shërbimeve Publike është ndër më të lakmuarit në pushtetin vendor, aq më tepër në Bashki të mëdha si ajo e Durrësit.
Kjo drejtori është përgjegjëse për investimet publike dhe infrastrukturore në zonën që mbulon bashkia përkatëse. Praktikisht, është sektori që menaxhon pjesën më të madhe të fondeve në Bashki.
Për këtë pozicion, Bashkia e Durrësit, e drejtuar nga Emirjona Sako, ka emëruar Ardian Iljazajn, i cili ka ende llogari të hapura me drejtësinë, nën dyshimet për korrupsion gjatë kohës që drejtonte Kadastrën e Durrësit, në periudhën Janar 2018-Janar 2019.
Shkarkimi si “halabak”
Ardian Iljazi, në Janar të 2019, u shkarkuar live prej kryeministri Edi Rama nga pozicioni i drejtorit të Kadastrës së Durrësit.
“Drejtori i Hipotekës së Durrësit, një halabak. Po trajtojmë hallet tona me njerëz të padenjë. U kërkoj të gjithë atyre që kanë hall, e që duan të zgjidhin hallin e tyre të na ndihmojnë edhe ne të trajtojmë hallin tonë të madh me njerëz të padenjë që nuk na mungojnë, si ishte edhe rasti i djeshëm i denoncuar nga Fiks fare, një drejtori që meriton vetëm një përcaktim, një halabak. Për të cilin është marrë masa e shkarkimit”- tha Rama, në një dalje publike në atë kohë.
Shkarkimi i Iljazit erdhi pasi një qytetar kishte shkuar 300 herë në zyrat e Hipotekës në Durrës për 6 vite, dhe nuk kishte marrë zgjidhje.
Qytetari më pas, i ishte drejtuar platformës së Bashkëqeverisjes, e cila kishte konstatuar shkelje ligjore, por edhe pas kësaj, drejtori nuk kishte reaguar.
Madje, Iljazi i kishte thënë qytetarit: “Meqenëse problemin e zgjidhe tek Rama, shko sërish tek Rama”.
Arrestimi
Ardian Iljazi ishte pjesë e grupit prej 18 personash, të arrestuar në Tetor 2019, pas një hetimi të Prokurorisë së Durrësit, për tjetërsimin e rreth 68 mijë metra katrorë tokë pranë Kepit të Rodonit.
Nga hetimet që kanë zgjatur për rreth një vit, mësohet se këta punonjës, mes tyre drejtues, juristë, hartograf, topograf, specialist, duke shpërdoruar detyrën, kanë tjetërsuar këtë hapësirë nga tokë shtetërore pa frut në tokë are, ua kanë shpërndarë personave të ndryshëm kundrejt përfitimit.
Në një komunikim zyrtar të Prokurorisë dhe Policisë së Durrësit në atë kohë, u bë me dije se këta ish-punonjës, sipërfaqen e tokës ua kanë shpërndarë personave me banim në Durrës, të cilëve nuk u takonte të përfitonin sipas ligjit “Për Tokën”.
Hetimi për këtë rast nisi pas një kontrolli të brendshëm administrativ, ku u konstatuan një seri paligjshmërish.
Pak javë më pas, Gjykata e Apelit të Durrësit ndryshon masën e sigurisë për ish-drejtorin e Hipotekës së Durrësit, Ardian Ilijazi, duke vendosur që ai të hetohet në gjendje të lirë.
“Boldnews.al” konfirmoi zyrtarisht pranë Prokurorisë së Durrësit se Ardian Iljazi është ende nën hetim, së bashku me personat e tjerë të përfshirë në këtë dosje.
Megjithatë, kjo nuk e ka penguar aspak Bashkinë e Durrësit që ta emërojë Ardian Iljazin në një prej posteve më të rëndësishme të institucionit.
