Kompania amerikane Novavax ka njoftuar se do të nisë fazën e dytë të testimit në njerëz. Kjo fazë testimi do të bëhet tek 2 665 persona të shëndetshëm dhe tek 240 persona të prekur nga virusi HIV, por në gjendje të mirë shëndetësore.
Kjo fazë testimesh do të bëhet në Afrikën e Jugut dhe është mbështetur financiarisht nga fondacioni Bill & Melinda Gates, të cilët i kanë dhuruar kompanisë 15 milionë dollar.
Në fillim të gushtit, pas testimit në një grup të vogël njerëzish, kompania amerikane tha se vaksina NVX-CoV2373, prodhon dy herë më shumë antitrupa tek personat e shëndetshëm, se sa janë gjetur tek personat e shëruar nga Covid-19, duke krijuar shpresat për sukses.
Efekti i vaksinës është rritur pas shtimit të një substance për të rritur imunitetin.
Kjo vaksinë është pjesë e programit të financuar nga qeveria amerikane për përshpejtimin e prodhimit të vaksinës.
Qeveria amerikane ra dakord në korrik t’i paguaj kompanisë 1,6 miliardë dollarë për të mbuluar testimet dhe prodhimin e vaksinës me qëllim blerjen e 100 milionë dozave të para, në janar 2021.
Testimet nisën në fund të majit, dhe përfshinë 106 subjekte të moshës 18 deri në 59 vjeç.
