Gjykata Themelore në Pejë ka caktuar dënimin për katër serbët që para tre ditësh kanë hyrë në bjeshkët e Istogut ku kanë gjuajtur me armë.
Sipas njoftimit të gjykatës personat me inicialet R.K, P.M, M.U dhe G.M, do të qëndrojnë në paraburgim për një muaj.
Ata kanë marrë dënimin pasi akuzohen për veprën penale për “përdorim të i paautorizuar të mjetit të rrezikshëm apo armës” .
Njoftimi i plotë:
Gjykata Themelore në Pejë – Departamenti për Krime të Rënda, ka aprovuar kërkesën e Prokurorisë Themelore në Pejë për caktimin e masës së paraburgimit ndaj të pandehurve R.K, P.M, M.U dhe G.M, për shkak të dyshimit të bazuar se : Më parë e gjer me datë 15.08.2020, në mënyrë të paautorizuar dhe në kundërshtim me nenin 5 par.1 të Ligjit për Armë (Ligji nr. 05/L-022) kanë mbajtur në pronësi dhe kontroll të paautorizuar armë nga të cilat me datë 15.08.2020, rreth orës 17:00, gjersa ishin së bashku në Bjeshkët e Istogut, kanë shkrepur disa herë në ajër duke shkaktuar frikësim dhe shqetësim te banorët e asaj ane, e të cilat armë pastaj i sekuestron policia. Me këto veprime të pandehurit dyshohet se kanë kryer veprën penale përdorim i paautorizuar i mjetit të rrezikshëm apo armës nga neni 367 par.1 të KPRK-së. Të pandehurve R.K, P.M, M.U dhe G.M iu është caktuar masa e paraburgimit në kohëzgjatje prej një (1) muaji”.
