Situata në Kakavijë sa vjen dhe rëndohet, ndërsa mijëra shqiptarë prej 4 ditësh presin të kalojnë në territorin grek, atje ku jetojnë dhe punojnë.
Fëmijë, të moshuar, gra janë detyruar të kalojnë edhe njënatë ose në makinat e tyre, ose jashtë, në pritje që pala greke të përshpejtojë kalimin e tyre para datës 17 gusht, kohë kur çdo shqiptar që do të hyjë në Greqi duhet të karantinohet për 1 javë.
Gjatë natës është shtuar edhe më shumë radha kilometrike e mjeteve dhe mijëra qytetareve që presin të kthehen në Greqi pasi kanë qenë me pushime ose kanë vizituar të afërmit e tyre në Shqipëri. Mësohet se pala greke ka punuar deri në orën 22.00 dhe pas kësaj ka mbyllur çdo veprim.
Kjo ka qenë arsyeja që mëngjesin e sotëm karvani i automjeteve gati është dyfishuar duke shkuar deri në 25 kilometra afër fshatit Grapsh.
