Prodhimi i një vaksine ndaj COVID-19 sipas një marrëveshjeje midis qeverive meksikane dhe argjentinase dhe kompanisë farmaceutike AstraZeneca (AZN.L) mund të fillojë në tremujorin e parë të vitit 2021, tha një zyrtare ekzekutive e AstraZeneca.
Sipas Reuter, Sylvia Varela, kreu i AstraZeneca në Meksikë, tha në konferencën e përditshme se testet e Fazës III pritet të përfundojnë deri në nëntor ose dhjetor.
Kompania planifikon fillimisht të prodhojë 150 milionë doza për shpërndarje në Amerikën Latine, dhe përfundimisht të bëjë të paktën 400 milionë doza për rajonin, shtoi ajo.
“Ne do t’i japim përparësi popullatës së prekshme”, tha ajo, duke theksuar se kostoja, megjithëse nuk ishte ende përfundimtare, nuk pritej të tejkalonte 4 dollarë për dozë ose më pak se 500 lekë të reja.
Presidenti i Argjentinës njoftoi për herë të parë marrëveshjen me Meksikën dhe AstraZeneca, prodhuesi i dytë më i madh i ilaçeve në Britaninë e Madhe, të mërkurën.
Ai tha se furnizimi fillestar synonte të arrinte në të gjithë Amerikën Latine përveç Brazilit, i ndihmuar nga investimet nga fondacioni i miliarderit meksikan Carlos Slim.
Një zëdhënës i Slim tha se shuma totale e investimeve do të ishte e rëndësishme, pa dhënë një shifër.
Siç shkruan më tej Reuters, presidenti meksikan Andres Manuel Lopez Obrador e përshëndeti marrëveshjen si “lajm i mirë” për Meksikën.
Ai tha se ai priste që vendi të vuajë ende nga pandemia deri në kohën kur vaksina të bëhet e disponueshme në fillim të vitit të ardhshëm.
Meksika ka regjistruar gati 55,000 vdekje dhe pothuajse gjysmë milioni raste, ndërsa numri i vdekjeve në Amerikën Latine në tërësi tani është afër 230,000.
Pas sigurimit të miratimeve të qeverisë, tha Varela, AstraZeneca planifikon të transferojë teknologjinë në grupin INSUD të Argjentinës dhe Laboratorios Liomont të Meksikës në fund të vitit, përpara se të kalojë në prodhim.
Substanca aktive në vaksinë do të bëhet në Argjentinë dhe do të dërgohet në Meksikë për t’u kompletuar për shpërndarje.
