Situata në Kakavijë/ Pas 72 orësh, FA dërgojnë një automjet me 10 mijë litra ujë

Ministrja e Mbrojtjes, Olta Xhaçka, ka udhëtuar drejt Kakavijës, atje ku prej 72 orësh vijon një situatë kaotike, ndërsa rradha e automjeteve që presin të kalojnë kufirin drejt Greqisë ka arritur në 20 km.

Xhaçka ishte e shoqëruar nga efektivë të Batalionit të Mbështetjes Rajonale të FA, ndërsa dërguan një automjet të posaçëm për të shpërndarë 10 mijë litra ujë për qytetarët që po presin në radhë prej tre ditësh për të kaluar drejt shtetit grek.

Në një deklaratë për mediat, lidhur me situatën kaotike Xhaçka tha se ministritë e jashtme të dy vendeve janë duke zhvilluar bisedime intensive.

Ministrja theksoi se do të bëjnë të pamundurën për të lehtësuar situatën.

LEXO EDHE  VIDEO/ 10 arrestime gjatë natës në Tiranë, ja çfarë ndodhi

“Kjo është një nga temat e bisedimeve shumë intensive që po zhvillojnë ministritë tona të jashtme. Ajo që po bëjmë ne këtu përmes emergjencave civile dhe angazhimeve të qeverisë ti vijnë në ndihmë të gjithë qytetarëve me të gjitha nevojat që kanë për të mos i rrezikuar më tej. Kjo është një situatë që është krijuar me vullnetin e lirë të gjithë udhëtarëve. Ne do bëjmë maksimumin për ta lehtësuar këtë situatë. Po e theksoj jemi në bisedime shumë intensive edhe për të shtyrë orarin edhe për të rritur kapacitete”, u shpreh ministrja Xhaçka.

Shkak për radhët e gjata në pikën kufitare është bërë testimi për Covid-19 që u bëhet emigrantëve shqiptarë nga pala greke.