Nga Boldnews.al
Kryeministri Edi Rama ka tre ditë që ndodhet në gjiret e Dhërmiut në pushimet e verës. Ndonjëherë futet edhe në rrjetet sociale, por vetëm për “COVID-19” ai nuk flet. Tashmë që numri i të vdekurve nga ky virus i ka kaluar 200 persona. Situata mbetet katastrofike, pasi problem kryesor është se çdo ditë shtohet me mbi 100 numri i të prekurve.
Dy spitalet Covid 1 dhe 2 janë në ezaurim të kapaciteteve të tyre, ndërsa vetë mjekët japin alarmin se aparaturat repiratore janë në numër të kufizuar dhe me këtë ritëm mund të mbërrijë momenti i kolapsit.
Një tjetër problem është se nuk ka më mjekë infeksionistë. Ministria e Shëndetësisë po mendon që të kthehet në covid tre një pjesë e ish-kirurgjisë së Tiranës në QSUT, por askush nuk ka menduar se me çfarë stafi do të mbushet dhe mbi të gjitha ku do të gjenden mjekët.
Mjekë infeksionistë dhe epidemiologë ka nxjerrë me shumë breza Fakulteti i Mjekësisë, por mjaft prej tyre (kryesisht në moshë të re) janë larguar drejt Gjermanisë, për shkak të pagave të ulëta dhe mbi të gjitha mungesës së shpresës. Sa herë kryeministri Rama pyetej për këtë fenomen, Rama e kalonte me ironi, përbuzje e madje edhe tallje deri në ekstazë. Sipas tij vendi prodhonte aq shumë mjekë sa e mbulonin çdo kërkesë që kishte vendi.
Po sot ku ndodhemi? Burime të Boldnews.al shprehen se shpërthimi i koronavirusit veçanërisht muajt e fundit ka bërë që të mendohet hapja e dy spitaleve të tjera përveç covid 1 (Spitali Infektiv) dhe Covid 2 (Spitali Shefqet Ndroqi).
Problem nuk janë godinat dhe shtretërit por më së pari stafi mjekësor dhe respiratorët e pakët në numër.
Në një raport që qarkullon si “top sekret”, parashikoihet që në muajt shtator-tetor numri i rasteve të reja me koronavirus mund ti kalojë 200 persona. Një pjesë e tyre do të kenë nevojë të detyrueshme për hospitalizim, por alarmi i madh është se nuk ka më mjekë të specializuar infeksionistë dhe epidemiologë.
Deri më tani fluksi i pacientëve është përballuar me mjekët e Spitalit Infektiv dhe të Shefqet Ndroqi por janë në limite, madje u është dashur që të kalojnë në orë të zgjatura përtej orarit të përcaktuar.
Vetë sëmundja kërkon ekspertizën e mjekëve infeksionistë, epidemiologë dhe atyre reanimatorë të cilët në muajt e fundit janë kthyer në domodoshmëri për shkak të numrit të lartë të pacientëve që konsiderohen në gjendje tepër të rëndë.
Përtej pamjeve imagjinare dhe shitjes surreale të kryeministrit si sukses të qeverisë në luftën kundër koronavirusit, fakt mbetet që jemi në një situatë katastrofike si për nga përhapja e frikshme ashtu edhe për mungesën e mjekëve specialistë.
Kryeministri Rama që në nisje të pandemisë nuk linte orë e çast pa reaguar dhe hiqej si kryepolic, kryemjek, kryefamiljar, kryeushtarak e madje edhe si baba i kombit sot hesht. Për çështje imazhi nuk është çudi që të bëhet edhe “kryefallxhor” për të parashikuar kohën kur mund të ikë pandemia, por të vërtetën e madhe të mungesës së mjekëve nuk e fsheh dot. Çfarë do i mbesë kryeministrit Rama, të bëhet vetë “infeksionist” dhe të bredhë studio më studio televizive?!
