Presidenti i Skënderbeut, Ardjan Takaj, ka folur pas vendimit të Gjykatës Federale të Zvicrës të cilët kanë lënë në fuqi dënimin e dhënë nga UEFA për klubin korçar.
Duke folur për “Panorama Sport”, ai ka deklaruar se ky vendim është marrë nga të njëjtët persona që i ndëshkuan edhe në shkallët e tjera.
Ai u premton tifozëve se do të vazhdojë të investojë në klubin korçar edhe pas këtij vendimi të rëndë.
“Nuk më surprizon ky vendim, mesa duket është e njëjta dorë që na ndëshkoi edhe në shkallët e tjera. Do të vazhdojmë të luajmë për qytetin dhe tifozët e mrekullueshëm të Skënderbeut. Ata që na kanë dashur gjithnjë dhe kanë sakrifikuar për këtë klub janë motivi jonë.
E ardhmja? Nuk i japim llogari askujt se për çfarë do luajmë…!? Pse të tjerët kanë lindur duke shkuar në Europë…?! Skënderbeu është i Korçës. Nëse unë do të kisha në plan të shkrija klubin dhe të vendosim një emër tjetër për ta nisur nga e para, atëherë do ta kisha bërë me kohë. Unë nuk jam nga ata që dorëzohem. Ashtu siç kam premtuar, do të vazhdoj sërish të jem në krye të klubit. Nuk e braktis Skënderbeun”, është shprehur ndër të tjera Takaj për Panorama Sport.
Kujtojmë që Skënderbeu është dënuar nga UEFA me 10 vite mospjesëmarrje në Kupa e Europës.
