Skënderbeu do të vuajë dënimin e dhënë nga UEFA ku nuk do të marrë pjesë në kompeticionet evropiane për 10 vite.
Klubi korçar e apeloi këtë vendim vjet në Gjykatën e Arbitrazhit Sportiv (CAS) teksa mori një përgjigje negative. Të njëjtën përgjigje ka dhënë edhe Gjykata Federale e Zvicrës, teksa kjo e fundit lë në fuqi vendimin e UEFA-s.
Skënderbeu tashmë kërkon të mbrohet sërish, në Gjykatën Europiane për të Drejtat e Njeriut, sikurse thotë në njoftimin e bërë sot.
Njoftimi i KF Skënderbeut:
“Sot, më datë 12 Gusht 2020, KF Skënderbeu-t ju bë me dije Vendimi i Gjykatës Federale Zvicerane në lidhje me rekursin e kryer ndaj Vendimit të CAS-it datë 12 Korrik 2019. Pavarësisht argumenteve të pakundërshtueshme të paraqitura në proces, trupa gjykuese e përbërë nga 5 anëtarë, përmes një vendimmarrje me shumicë të thjeshtë votash, 3 vota pro dhe 2 kundra, vendosi rrëzimin e rekursit të kryer nga KF Skënderbeu, duke konfirmuar vendimin e mëparshëm të CAS-it.
Në momentin aktual, KF Skënderbeu po shqyrton të gjitha mundësitë për një ankim të mëtejshëm në Gjykatën Europiane për të Drejtat e Njeriut, pasi në asnjë mënyrë nuk mund të konformizohet me një vendim i cili, në çmimin tonë, cenon rëndë parimet e të drejtës për një proces të rregullt ligjor.
Për këtë, informacione të mëtejshme në lidhje me përmbajtjen e vendimit në fjale do të bëhen publike, pasi të jenë kryer të gjitha vlerësimet e rastit.
Pavarësisht efekteve tejet të rënda që ky vendim ka, KF Skënderbeu do të vazhdojë rrugën e tij drejt arritjes sërish të sukseseve historike të mëparshme, të cilat ende sot shërbejnë si model e frymëzim për futbollin shqiptar. Puna vazhdon”.
