Mjekja Silvana Çeliku thotë se spitali Onkologjik është i vetmi që e ka nën kontroll situatën e Covid-19, duke hedhur poshtë aludimet për të infektuar në pavijonet e tij.
Ajo shprehet se duhet një ndërgjegjësim në radhët e qytetarëve për të ruajtur distancën dhe për të shmangur radhët në spital, duke ruajtur kështu shëndetin e tyre.
Çeliku shkruan se kjo bëhet për të mirën dhe shëndetin e të gjithëve.
“Mendoja se media është për të informuar njerëzit në mënyrë të drejtë dhe jo për të dhënë lajme për të bërë lajm. Spitali Onkologjik është i vetmi që e ka situatën e Covid nën kontroll duke menazhuar në kohë reale dhe brenda të gjitha protokolleve çdo rast të dyshuar për Covid 19.
Dhe në vend të bëjmë lajm për të mirë, tendenca është që vetëm të poshtërohemi e të dalim si të pa shpirt. Shumë jo profesionale. Nëse duan të na vënë popullin kundra, ja kanë arritur.
Pacientët duhet të mësohen të vinë në oraret e caktuara, të shoqërohen vetëm nga një familjar dhe të respektojnë distancën e caktuar. Askush nuk do të hyjë në spital pa rradhë dhe i pa shoqëruar nga kordinatorët tanë.
Pacientët dhe të gjithë të tjerët duhet ta kuptojnë që kjo bëhet për të mirën e shëndetin e të gjithëve dhe duke ndjekur rregulloren e gjithë spitaleve në botë. Ju lutemi na lini të bëjmë punën tonë me korrektësi se vetëm kështu do ta mposhtim virusin e mallkuar. Ju faleminderit që më mirëkuptoni”, shkruan Çeliku.
