Vrau 65-vjeçarin, autori la thikën/ Policia: Kemi shenjat e gishtave, por nuk figuron

Shume mister për autorin që hyri të vidhte misrin në arë e qëlloi dy vëllezërit, duke lënë të vdekur 65-vjeçarin Fiqiri Çalliku.

Policia e Durrësit dhe ajo e Shijakut mbërritën menjëherë në vendin e ngjarjes dhe nisën hetimet për identifikimin dhe arrestimin e autorit. Hetuesit e çështjes kanë shoqëruar disa persona si të dyshuar, që mund të kenë dijeni për ngjarjen.

Ata janë kryesisht persona që pjekin dhe tregtojnë misra nëpër rrugët e qytetit bregdetar si dhe përgjatë vijës bregdetare. Në momentin e largimit nga vendi i ngjarjes, autori la thikën, me të cilën qëlloi dy vëllezërit dhe mbi të edhe shenjat e tij të gishtërinjve.

Por, ky fakt duket se nuk e ka ndihmuar shumë Policinë, pasi shenjat e gishtërinjve nuk rezultojnë gjëkundi, çka do të thotë se kemi të bëjmë me një autor që nuk ka as pasaportë dhe as kartë identiteti.

LEXO EDHE  Rrëfimi i biznesmenit që u grabit në Nikël: Gjakun nuk e fal, policia të gjejë autorët

“Shenjat e gishtërinjve nuk rezultojnë kurrkund. Ndaj, ne dyshojmë se autori duhet të jetë nga ata persona që shesin misra të pjekur nëpër rrugët e Durrësit apo përgjatë vijës bregdetare, person i cili nuk ka as pasaportë dhe as kartë identiteti. Po mbajmë nën monitorim të gjithë ata persona që merren me këtë lloj aktiviteti, të tregtimit të misrave të pjekur. Kemi shoqëruar disa prej tyre dhe po i mbajmë nën vëzhgim. Kemi shumë besim se do ta zbulojmë se kush është autori kësaj ngjarje të rëndë”, tha një burim nga grupi i hetimit për “Panorama”.