Kastrioti nuk humbet kohë për organiz imin e ekipit të ri. Rikthimi në Superiore do të thotë se skuadra e drejtuar nga trajneri Ramazan Ndreu duhet të ketë tjetër organikë, por ka edhe çështje të tjera të rëndësishme që duhen zgjidhur, siç është ajo e stadiumit ku do të luhen ndeshjet, sepse krutanët nuk e kanë gati stadiumin e tyre.
Sezonin e ri 2020-2021 krutanët do t’i zhvillojnë ndeshjet si skuadër pritëse në stadiumin e Kamzës dhe kjo tashmë është zyrtare. Drejtuesit e klubit krutan kanë firmosur edhe kontratën përkatëse me Bashkinë e Kamzës. Kastrioti në këtë mënyrë do të jetë për të tretin sezon në “migrim”, pasi stadiumi i Krujës ka mbetur pezull.
Aty nisën punimet, në fakt, vazhduan pak ditë dhe më pas u pezulluan. Nuk dihet ende se kur do të fillojnë dhe në këto kushte Kastrioti duhet të vuajë edhe të luajturit në fushë asnjanëse në Superiore.
