Orges Shehi dhe klubi i Kukësit kanë ndërprerë bashkëpunimin mes tyre. Lajmin e ka bërë zyrtar klubi verilindor i cili doli edhe me një komunikatë përmes së cilës bëhet me dije mbyllja e bashkëpunimit.
“Klubi i Kukësit njofton se Orges Shehi nuk është më trajner i skuadrës sonë. Pas përfundimit të sezonit, presidenti dhe trajneri kanë rënë dakord për të mos vazhduar më aventurën së bashku. Megjithëse një trajner i ri në eksperiencë, presidenti i besoi trajnerit Shehi një nga ekipet më të mira që Kukësi ka pasur.
Klubi i Kukësit e falënderon trajnerin Shehi për kontributin e dhënë në këtë periudhë të vështirë për futbollin shqiptar dhe jo vetëm dhe i uron suksese në të ardhmen”, shkruhet në njoftimin e Kukësit.
Trajneri i ardhshëm i verilindorëve pritet të jetë Skënder Gega, ku bisedimet mes palëve janë në fazë të avancuar.
