Një vrasje ndodhi në Elbasan në orët e para të mëngjesit të sotëm, ndërsa viktimë mbeti Florian Lamçaj. Ky i fundit nga të dhënat e para humbi jetën në spitalin rajonal, pas një konflikti me shishe dhe sende të forta që pati me dy persona të tjerë.
Policia njoftoi zyrtarisht se ngjarja ndodhi në lagjen ” Luigj Gurakuqi”, Elbasan, ku në gjendje të dehur janë konfliktuar duke u dëmtuar me njëri-tjetrin me shishe dhe sende të forta shtetasit A.H., 42 vjeç, S.S., 34 vjeç, dhe F.L., rreth 40 vjeç, banues në Elbasan. Ky i fundit ka humbur jetën për shkak të plagëve të marra.
Raportohet se dy shtetasit e tjerë të përfshirë në këtë konflikt kanë marrë plagë të lehta dhe janë shoqëruar në Komisariatin e Policisë Elbasan, për sqarimin e rrethanave të ngjarjes.
Njëri prej të shoqëruarve, sipas raportimeve, është Sokol Sanxhaktari, dhëndri i Qazim Sejdinit, ish-kryebashkiakut të Elbasanit.
Sanxhaktari është një emër jo pak i njohur, ndërsa konsiderhet me influenca qofshin politike, ashtu edhe në atë që quhet si “bota e nëndheshme”.
Nuk dihet nëse për ngjarjen e ndodhur mëngjesin e sotëm ndaj Sanxhaktarit do të ngrihet akuzë, apo ai do të lirohet, por ai është akuzuar më parë dhe njëherë është ndaluar nga policia, por më pas zv. Drejtori i Policisë së Qarkut që kreu arrestimin u largua nga detyra.
