Zgjedhjet në Universitete/ Ironia e mjekes: Suksese atyre që garojnë vetëm

Mjekja e njohur Anika Dokle ka reaguar në rrjetet sociale, një ditë para zhvillimit të zgjedhjeve në Universitete.

Dokle shprehet se një universitet vlen aq sa vlejnë kërkuesit shkencor të saj dhe se shoqëria nuk paguan profesorët për të dhënë leksione, por studentët për ti marrë ato.

Sipas saj, përfshirja e studentëve në zgjedhjet universitare e bën këtë proces më demokratik, por jo domosdoshmërisht më cilësor.

Dokle ka uruar ata të cilët do garojnë në zgjedhjet e universitetit duke ironizuar “suksese garuesve për drejtues në universitete, veçanërisht atyre që garojnë të vetëm”.

Postimi i plotë i Dokles

Disa konsiderata(sociale) për Universitetin, meqë jemi në kohë zgjedhjesh…

-Universiteti nuk duhet të jetë vetëm qendër e dijes në kuptimin absolut të fjalës: një universitet që divorcohet nga problemet e kohës shndërrohet në manastir.

-Universiteti është diskutim, eferveshencë, jo mendim unik.

LEXO EDHE  Fotoja e infermieres italiane bëhet virale, ja arsyeja

-Universitetet e sotme “shpërblejnë” nerds-at dhe “përjashtojnë” shpirtrat dinamikë dhe kreativë.

-Një universitet vlen aq sa vlejnë kërkuesit shkencorë të tij.

-Çdo universitet që merr fonde publike ka përgjjegjësi shoqërore, sidomos përgjegjësinë e cilësisë së dijes që ofron.

-Shoqëria nuk paguan që profesorët të japin leksione, por që studentët t’i marrin ato.

-Universitetet tona nuk figurojnë në ranking-un ndërkombëtar.

-Universiteti duhet t’u përgjigjet nevojave të trajnimit për të përballuar cunamin dixhital.

-Fundamentalizmi demokratik na bëri të besojmë që të gjithë kanë të drejtë të ndjekin studimet universitare. Unë nuk mendoj kështu!

-Përfshirja e studentëve në proçesin e përzgjedhjes së drejtuesve të universitetit, e bën këtë të fundit më demokratik por jo domosdoshmërisht më cilësor.

Dhe e fundit:

Suksese garuesve për drejtues në universitete, veçanërisht atyre që garojnë të vetëm!