Kreu i Partisë Demokratike, Lulzim Basha, do të zhvillojë një takim me tre ambasadorët e SHBA, BE-së dhe Britanisë së Madhe.
Takimi do të nisë në orën 10:00 e do të zhvillohet në selinë e PD. Më konkretisht në takim me kreun e PD-së do të jenë ambasadorja amerikane Yuri Kim, ambasadori i BE-së Luigi Soreca dhe ambasadori i Britanisë, Duncan Norman.
Në takim pritet të marrin pjesë edhe disa nga aleatët e Bashës.
Tema e diskutimit me shumë mundësi do të jetë reforma zgjedhore dhe ndryshimet kushtetuese, të cilat pritet të miratohen në dy seancat e fundit të kuvendit.
Ky takim vjen një orë para mbledhjes së Këshillit Politik, ku do të diskutohet për hapjen e listave dhe ndikimin e amendamenteve kushtetuese tek koalicionet parazgjedhore.
