Prej disa ditësh mbajtja e maskave në ambiente të mbyllura është detyrim ligjor dhe shkelësit dënohen me gjobë.
Ndërkohë që një tjetër rregull në kuadër të masave anti-Covid ësht ai që baret dhe restorantet nuk mund të shërbejnë në ambiente të mbyllura.
E nëse pjesa dërrmuese, qoftë kjo e qytetarëve ashtu edhe e bizneseve po respektojnë rregullat e propozuara nga Komiteti Teknik dhe që publikohen nga ministrja e Shëndetësisë, duket se ato shkelen apo shpërfillen nga Kryeministri.
Një foto qarkullon në rrjetet sociale, ku shfaqet Kryeministri Edi Rama dhe kryebashkiaku i Tepelenës, Tërmet Peçi, të ulur ballë për ballë, rreth sofrës, në mjediset e brendshme të restorantit.
Rregulli i parë i shkelur është ai se restoranti që ka mirpritur Ramën në ambientet e brendshme ka shkelur rregullin, i cili duket se nuk ka asnjë vlerë kur bëhet fjalë pr Kryeministrin.
Rregulli i dytë është fakti se kamarieri që shërben nuk mban maskë, sërisht veprim i dënueshëm me gjobë.
Rregulli i tretë dhe ndoshta më i rëndi është fakti se Rama ka drekuar në ambientet e brendshme të lokalit, duke dhënë një shembull aspak pozitiv. Dhe po të kihen parasysh apelet për mbajtjen e maskës në ambiente të mbyllura, që tashmë është ligj, Kryeministri e ka shkelur edhe këtë rregull.
Ndoshta rregullat nuk vlejnë për Kryeministrin, ose ky i fundit, kur ndodhet pranë Tërmetit, është i sigurtë se koronavirusi ka “frikë” të afrohet.
