Teksa selia blu ka nisur betejën e re për lista të hapura zgjedhore, paralelisht po vijon me procesin zgjedhor brenda partisë për përcaktimin e kandidatëve për deputetë dhe kryetarë bashkie. 25 korriku shënon ditën e fundit të afatit që u ishte lënë në dispozicion strukturave të Partisë Demokratike për të sjellë propozimet e tyre.
Mësohet se baza e selisë blu ka propozuar rikthimin e emrave si ish-kryeparlamentarja Jozefina Topalli, ish-ministri i Jashtëm Besnik Mustafaj, ish-sekretari i përgjithshëm Arben Ristani, kryebashkiakja aktuale e Shkodrës, Voltana Ademi dhe ish-kreu i KLSH, Bujar Leskaj.
Baza ka propozuar edhe emra të ri si futbollistin e kombëtares Andi Lila, regjisori Robert Budina, analisti Agron Gjekmarkaj etj.
Deri në fund të korrikut u është lënë afat të vetëkandidohen ata që duan të përfaqësojnë PD-në në nivel qendror dhe lokal. Nga 1 gushti deri në 15 shtator do të bëhet seleksionimi i emrave nga një komision i vlerësimit të kandidatëve, që do të ketë 5 anëtarë. Deri më tani janë konfirmuar në përbërje ish-ministrat Genc Ruli dhe Besnik Mustafaj.
Në fazën e tretë, nga 15 shtatori deri në 30 shtator, lista e kandidatëve potencialë do të konsultohet me anëtarësinë përmes parimit një anëtar, një votë. Procesi mbyllet me zyrtarizimin e listës nga Kryesia dhe miratimin e saj nga Këshilli Kombëtar i PD-së.
/A2News/
