Lorenc Trashi i ka dhënë fund aventurës me skuadrën e Partizanit teksa do ti bashkohet klubit të Qadsia në Kuvajt. 28-vjeçari ka firmosur për pesë vite ndërkohë gjatë kësaj kohe do të përfitojë rreth 1 milionë euro.
Mbrojtësi i krahut të majtë ka luajtur ditën e djeshme ndeshjen e fundit me të kuqtë dhe pas ndeshjes është përshëndetur me shokët e skuadrës. Në rrjetet sociale ai ka postuar edhe një foto së bashku me ekipin.
Sigurisht ka edhe disa fjalë për të thënë: “Shpresoj që në të ardhmen e afërt të takohemi sërish. Të gjitha kujtimet e çmuara që kemi kaluar së bashku do të mbeten në mendjen time. Më shumë se një familje.”
Lorenc Trashi iu bashkua Partizanit në maj të vitit 2014, pas rënies së Lushnjes në Kategorinë e Parë. Trashi ishte pjesë e të kuqve për gjashtë sezone, kohë në të cilën zhvilloi 192 ndeshje duke shënuar edhe 12 gola.
