Kategoria Superiore drejt fundit, të gjitha rezultatet e javës së 35-të

Mbrëmjen e djeshme janë luajtur pesë sfidat e javës së 35-të në Superiore. Laçi mposhti kampionët e rinj të Shqipërisë, Tiranën, me rezultatin e thellë 3-1. Partizani triumfoi 3-0 kundër Vllaznisë, ndërsa Flamurtari-Teuta, ishte një supersfidë, që përfundoi me shifrat 2-3. Në Ballsh, Bylisi fitoi pastër 2-0 kundër Luftëtarit. Ndërkohë Kukësi me Skënderbeun u ndanë në barazim pa gola.

Kështu me fitoren kundër Vllaznisë, Partizani u ngjit në kuotën e 53 pikëve, duke larguar përfundimisht çdo dyshim për zonën “Play-Out”. Vendi i tetë, i mbeti Vllaznisë, që do të luajë kundër ekipit fitues në duelin Besëlidhja-Pogradeci.

Laçi në Kurbin, mposhti 3-1 kampionët e Tiranës, falë një dopietë të Kyrian Nwabueze dhe një goli të Xhixhas. Sulmuesi i Laçit, është golashënuesi më i mirë në Superiore, me 23 gola të shënuar.

Teuta donte fitoren për të siguruar matematikisht kualifikimin në Europa League dhe ia doli. Ekipi i Edi Martinit triumfoi 2-3 në Vlorë kundër Flamurtarit vendas.

LEXO EDHE  Serbia ndalon boksierët e Kosovës të kalojnë kufirin

Pjesa e parë u mbyll në barazim 2-2. Lorenco Vila kaloi dy herë në avantazh miqtë nga Durrësi, por kuqezinjtë reaguan me anë të Denis Pjeshkës dhe Ardit Hoxhajt.

Gjithsesi, Teutës i bëri mirë pushimi dhe gjeti golin e fitores në minutën e 64-t me anë të Rubin Hebajt, me ekipin bregdetar që siguron zyrtarisht kualifikimin në kompeticionet evropiane.

Bylisi nuk hasi probleme në shtëpi kundër Luftëtarit. Ekipi i Dovedan shënoi dy gola në fundin e pjesës së parë, duke siguruar qëndrimin edhe për sezonin e ardhshëm në Superiore.

Portieri Isli Hidi ktheu në gol një penallti në minutën e 34-t, ndërsa shkodrani Qardaku vulosi triumfin e vendasve me golin e shënuar në minutën e fundit të pjesës së parë.

Kategoria Superiore, java 35

Partizani-Vllaznia 3-0

Laçi-Tirana 3-1

Bylis-Luftëtari 2-0

Flamurtari-Teuta 2-0

Kukësi-Skënderbeu 0-0