Qendra Evropiane për Parandalimin dhe Kontrollin e Sëmundjeve përditësoi të premten të dhënat rekomanduese për hapjen e kufijve ku bie në sy prirja në rritje e rasteve ditore.
Kështu duke iu referuar numrit të të infektuarve, mesatarja e 14 ditëve të fundit në 27 vendet anëtare të Bashkimit Evropian ka qenë 16 të infektuar për çdo 100 mijë banorë – dy javë më parë, më 15 korrik, kjo mesatare ishte 13 të infektuar/100 mijë banorë, raporton “EuroNews Albania”.
Mesatarja është rritur ndjeshëm për vendet e Ballkanit nga 73 raste në 85 dy javët e fundit. Prirja rritëse më shqetësuese është ajo në Mal të Zi nga 123 raste për çdo 100 mijë banorë në 162 raste.
- Shqipëria 44 (+5)/100 mijë banorë
- Serbia 77 (+14)/100 mijë banorë
- Bosnje e Hercegovina 96 (+24)/100 mijë banorë
- Maqedoni e Veriut 100 (+6)/100 mijë banorë
- Kosova 132 (+8)/100 mijë banorë
- Mali i Zi 162 (+39)/100 mijë banorë
Me këtë mesatare BE-ja do të vazhdojë t’i mbajë mbyllur kufijtë Shqipërinë dhe vendet e tjera nga Ballkani Perëndimor.
Brukseli ka rekomanduar që hapja e kufijve të bëhet sipas një rregulli ku nëse vendet do të raportojnë një mesatare më të ulët se ajo e BE-së në 14 ditët e fundit mund të këshillohet hapja e kufijve.
Për sa i përket vendeve në BE, Luksemburgu është ai që raporton mesataren më të lartë për çdo 100 mijë banorë (206 raste) ndërsa Malta e Estonia kanë mesataren më të ulët (1 rast).
