Për ish-deputetin dhe kreun e LZHK Dashamir Shehi, kushtetuta po ndryshohet për një grusht votash.
I ftuar në ”Ekopolitikë” në ”RTV Ora” , Shehi u shpreh se kjo nuk është hera e parë që bëhet ky veprim për vota, pasi diçka e tillë u bë në vitet 2008 dhe 2011.
Sipas tij, kushtetuta duhet të ndryshohet në rastet kur duhet të balancohet presidenti me kryeminstrin, apo për një sistem drejtësie të pavarur.
“Ne po e ndryshojmë kushtetutën për një grusht votash, ç’është ky debat i sotëm? Ta bëjmë kështu apo ta bëjmë ashtu. E kemi ndryshuar disa herë për grusht votash. E kemi ndryshuar disa herë për një grusht votash. E kemi ndryshuar në vitin 2008, e kemi ndryshuar në 2011. Një herë është ndryshuar kushtetuta, sepse një parti kishte nevojë për dy komisionerë, që një ta marrësh ti e një unë. Ne duhet ta ndryshojmë kushtetutën për të balancuar presidentin me kryeministrin. Ne duhet të balancojmë për një sistem drejtësie të pavarur”, shtoi Shehi.
Destabilitetet në Shqipëri përsa i përket insitucioneve dhe sidomos ai politik, ka qenë gjithmonë të pranishme gjatë 30 viteve të demokracisë.
Shehi, dha dy arsye përse kemi kaluar këto kriza. Sipas tij, demokracinë e bëjnë njerëzit, por se popullsia në vend është shumë e vogël, dhe nuk ka mundësi konkurence apo që institucionet të jenë të pavarura. Për Shehin, ka të bëjë edhe me shkallën e ulët ekonomike në Shqipëri, pasi ka dhe të tjera kombe të vogla, por janë të pasura.
“Shteti siç ka nevojë për cilësi, ka nevojë edhe sasiore, për të pasur produkt cilësor. Edhe një komb për tu bërë komb ka nevojë për ca numra. Ideja që kombi shqiptar në vitin 1912 ishte 2 milion, shumë pak. Kombi shqiptar, ne që jemi lindur në Ballkan bëhemi 10 milion, por nuk jemi të gjithë këtu. Shqipëria e vitit 1990 ishte 3,3 milion, ndërsa sot 2,7 million banorë. Ne sot duhet të ishim 4,2 milion. Po të kishim këto shifra do të kishim mundësi konkurence, insitucionet mund të bëheshin të pavarura. Demokracinë e bëjnë njerëzit. Por edhe shkalla e ulët ekonomike. Ka dhe kombe të vogla në Europë, dhe qëndrojnë në këmbë në sajë të pasurisë”, tha kreu i LZHK.
