Kuvendi miratoi sot me 99 vota draftin e dakordësuar më 5 qershor në Këshillin Politik lidhur me reformën zgjedhore.
Votimi në Parlament ka tërhequr vëmendjen e mediave ndërkombëtare, ku New York Times shkruan se “Kuvendi i Shqipërisë miratoi të enjten reformën zgjedhore, që synon garantimin e zgjedhjeve të lira dhe të ndershme dhe konsiderohet si një kusht kryesor për fillimin e negociatave të pranimit në Bashkimin Europian”.
“Votimi i së enjtes erdhi gati shtatë javë pasi partitë politike shqiptare arritën një marrëveshje për reformën zgjedhore më 5 qershor. Marrëveshja erdhi pas dy ditësh takimesh mes forcave politike kundërshtare në rezidencën e ambasadores amerikane, Yuri Kim, e cila lehtësoi dialogun së bashku me kolegët e BE dhe Britanisë së Madhe”.
Në shkrim theksohet se ndërkombëtarët kanë reaguar pas miratimit të marrëveshjes.
SHBA tha në një deklaratë se marrëveshja duhet zbatuar në mënyrë gjithëpërfshirëse dhe transparente.
“Parlamenti do të votojë javën e ardhshme që partitë politike të ofrojnë lista të hapura kandidatësh, koalicionesh politike dhe pragun zgjedhor për të hyrë në parlament, një veprim që deri më tani nuk është pranuar nga opozita e qendrës së djathtë, e udhëhequr nga Partia Demokratike, e cila bojkotoi parlamentin vitin e kaluar.
Të gjitha palët duhet të marrin pjesë në mirëbesim; të shpjegojnë pozicionet e tyre qartë dhe plotësisht njëri-tjetrit dhe popullit shqiptar; dhe të kërkojnë një zgjidhje që është në të mirën e të gjithë popullit shqiptar dhe vazhdon ta çojë vendin përpara në rrugën e tij demokratike,” thekson ambasada e SHBA, pasqyrohet në NYT.
