I ftuar në ‘Çim Peka Live’, kreu i Partisë Agrare Ambientaliste, Agron Duka, është shfaqur mosbesues ndaj Kryeministrit Edi Rama, madje i kërkon kreut demokrat Lulzim Basha të reagojë fuqishëm ndaj Kreut të Qeverisë që po shkel çdo marrëveshje.
“Ky do miratojë më 30 korrik ndryshimet kushtetuese dhe i thotë opozitës hajde të flasim bashkë. Është sikur, meqënëse unë jam marrë me volejboll, të thotë hajde luajmë por unë do fitoj 3-0 me sete.
Unë nuk mendoj që kjo mund ti sjellë të mira Shqipërisë, as fundit të krizës në politikën shqiptare, por kjo mund ti sjellë mirë vetëm Ramës dhe sektit të tij të Rilindjes.
Nëse ndërkombëtarët menduan se ulja në tryezë i shërben zgjidhjes së krizës politike, nuk e bën se ky është produkti më i mirë.
Ata menduan për kthimin në normalitet të jetës politike në Shqipëri. Ky do të bëjë të kundërtën. Unë nuk mendoj që ky ka ndjeshmërinë që të reagojë pozitivisht.
Basha dhe Opozita duhet të reagojë fuqishëm ndaj këtij njeriu”, tha Duka.
