Ambasada gjermane dhe ajo britanike në Tiranë kanë përshëndetur miratimin nga Kuvendi të marrëveshjes së 5 qershorit, duke e cilësuar si një hap përpara.
Kuvendi miratoi draft-marrëveshjen e dakordësuar nga Këshilli Politik, në bazë të së cilës për herë të parë do të aplikohet identifikimi biometrik i zgjedhësve.
Trupi Diplomatik i akredituar në Tiranë, por edhe BE e SHBA, kanë përshëndetur miratimin nga Kuvendi të marrëveshjes. Sipas tyre, diskutimet e mëtejshme lidhur me ndryshimet në Kod duhet të bëhen me pjesëmarrjen aktive të të gjitha palëve dhe procesi duhet të jetë transparent.
Gjermania
Ambasadori gjerman në Tiranë, Petër Zingraf, duke përshëndetur dekretimin e marrëveshjes së 5 qershorit ditën e sotme në Kuvend, u kujton në deklaratën e tij aktorëve politikë se ‘në zbatim të marrëveshjes, por edhe në ndërmarrjen e të gjitha hapave të tjera, të vijojnë më tej me dialogun dhe gjithëpërfshirjen.’
‘Parlamenti shqiptar ka miratur ditën e sotme ndryshime në Kodin Zgjedhor dhe ka implementuar kësisoj marrëveshjen e 5 qershorit të negociuar mbi bazën e rekomandimeve të ODHIR-it në Këshillin Politik.
Unë e përshëndes këtë hap të rëndësishëm në rrugën drejt Konferencës së Parë Qeveritare në kuadrin e bisedimeve të anëtarësimit në BE.
Në pikën e reformës zgjedhore të vendimit të tij të shtatorit 2019 Bundestag-u Gjerman fliste për një ‘dialog të hapur, ku të përfshihen të gjitha forcat politike’. Vendimi i Bundestag-ut është njohur nga të gjitha institucionet politike shqiptare në vend si një ‘Roadmap’ për kalendarin shqiptar të reformave.
Ndaj u bëj thirrje të gjithë aktorëve që në zbatim të marrëveshjes, por edhe në ndërmarrjen e të gjitha hapave të tjera, të vijojnë më tej me dialogun dhe gjithëpërfshirjen. Reformat e thella në Kodin Zgjedhor sipas standardeve të OSBE-së dhe Komisionit të Venecias kanë nevojë për një përgatitje të thelluar të realizuar brenda një kohe të mjaftueshme dhe mund të kenë efekt prapaveprues mbi marrëveshjen e implementuar ligjërisht tanimë.’
Britania e Madhe
Ambasadori i Britanisë së Madhe ka reaguar pas miratimit të marrëveshjes së 5 Qershorit në Parlament.
Duncan Norman, me anë të një postimi në Twitter uron parlamentin e”Marrëveshjes së 5 qershorit pas një periudhe të gjatë pune gjithëpërfshirëse…”
Në postimin e tij, ambasadori britanik thekson se çdo ndryshim i mëtejshëm i reformave duhet të jetë vërtet përfshirëse me pjesëmarrjen aktive të të gjitha palëve.
OSBE
Gjithashtu OSBE-ODHIR në Tiranë ka përshëndetur miratimin e ndryshimeve në Kodin Zgjedhor.
Përmes një reagimi, thekson se mbetet i gatshëm që t’i ofrojë ndihmë autoriteteteve shqiptare në këtë rrugë, duke nënvizuar faktin se zbatimi i marrëveshjes mbetet kyç.
“Mirëpresim miratimin e ndryshimeve në Kodin Zgjedhor, sot, në Kuvendin e Shqipërisë, në përputhje me marrëveshjen që palët arritën më 5 qershor dhe mbështetur në rekomandimet e OSBE/ODIHR-it. Si me çdo reformë tjetër, zbatimi është kyç. Ne mbetemi te gatshëm t’i ndihmojmë autoritetet shqiptare në këtë rrugë, si edhe për zhvillimin e hapave të tjerë të reformës. U bëjmë thirrje të gjitha palëve të vijojnë dialogun për reforma të mëtejshme”, thuhet në reagimin e OSBE.
