Ish-kreu i Këshillit të Emërimeve në Drejtësi, njëherësh ish-anëtar i Gjykatës së Lartë, Ardian Dvorani pritet të kthehet si gjyqtar në Apel.
Këshilli i Lartë i Gjyqësorit vendosi në mbledhjen e sotme ti propozojë Dvoranit vendet vakante, që janë në 6 Gjykata të Apelit në vend.
“Pas diskutimeve, Këshilli vendosi publikimin e pozicioneve të lira në nivel apeli, për gjyqtarin Ardian Dvorani, që ka të drejtën e caktimit në një pozicion të tillë. Pas kësaj vendimmarrje gjyqtari Ardian Dvorani, ftohet për të zgjedhur deri më datë 28.07.2020, njërin nga pozicionet e lira në gjykatat e mëposhtme: Gjykata e Apelit Tiranë, Gjykata e Apelit Administrativ, Gjykata e Apelit Durrës, Gjykata e Apelit Korçë, Gjykata e Apelit Gjirokastër, Gjykata e Apelit Shkodër”, njofton KLGJ.
Rrëzimi i të gjithë kandidaturave për dy vende vakante në Gjykatën Kushtetuese fundjavën e kaluar, i hapi rrugën Ardian Dvoranit për të ushtruar sërish funskionin e gjyqtarit në sistemin gjyqësor.
Në Qershor, Këshilli i Lartë Gjyqësor vendosi përfundimin e mandatit të Ardian Dvoranit në Gjykatën e Lartë, pas kërkesës së Presidentit Ilir Meta, duke qenë se mandati i tij kishte mbaruar që prej vitit 2014. Dvorani u largua në këtë mënyrë edhe nga kryesimi i Këshillit të Emërimeve në Drejtësi.
Ai është etiketuar nga Presidenti Ilir Meta dhe opozita si “njeriu i Partisë Socialiste”.
