Bankat e nivelit të dytë forcojnë kriteret për dhënien e kredive.
Në një raport të Bankës së Shqipërisë theksohet se gjatë periudhës prill – qershor, kreditimi ka qenë i zbehtë.
Pasiguria për shkak të situatës së krijuar nga mbyllja e aktiviteti ekonomik ka bërë që bankat të aplikojnë standarde më të shtrënguara edhe në kreditë e dhëna individëve përfshirë ato për blerje banese.
Ashpërsimi i kritereve u ndikua veçanërisht nga perceptimi i bankave për rrezik të shtuar lidhur me situatën ekonomike dhe perspektivën për të, aftësinë paguese të kredimarrësit, si edhe me kolateralin.
Po ashtu, edhe toleranca më e ulët e bankave ndaj rrezikut ishte faktor i rëndësishëm në vendimet për kredititmin e ekonomisë gjatë tremujorit të dytë të këtij viti.
Sipas vrojtimit të Bankës së Shqipërisë, edhe kërkesa për të marrë kredi nga ana e biznesve apo e qytetarëve ka pësuar rënie.
Kërkesa më e ulët për kredi ishte e shpërndarë në të gjitha kategoritë e madhësisë së biznesit.
Gjithashtu, kërkesë e dobët u vlerësua si për kreditë dhënë me qëllim financimin e investimeve, ashtu edhe për mbulimin e nevojave për likuiditet.
Në tremujorin e tretë parashikohet që kushtet për dhënien e një kredie të jenë edhe më të forta.
Ndërsa të vetmet kërkesa për kredi në tremujorin e ardhshëm pritet të jenë për likuiditet ose për të bërë pagesat të ndryshme , ndërkohë që ajo për investime pritet sërish në rënie.
I vetmi faktor që ka ndikuar pozitivisht në kredidhënie gjatë këtij muaji rezulton të jetë skema e garancisë sovrane, ofruar nga qeveria shqiptare në mbështetje të sektorëve të prekur prej efekteve negative nga Covid-19. /abcnews/.
