Kontrata e Thiago Alcantarës me Bayern Munchen përfundon verën e ardhshme por dëshira e lojtarit është largimi nga skuadra gjatë kësaj vere.
Pak ditë më parë, Rummenige, pati deklaruar se mesfushori spanjoll nuk dëshironte rinovimin me kampionët e Bundesligës duke i hapur kështu rrugën e largimit.
E ardhmja e 29-vjeçarit shihet te Liverpooli. Mediet gjermane dhe angleze, raportojnë se 29-vjeçari ka arritur akordin me kampionët e Premier League, teksa ka nxjerrë në shitje shtëpinë e tij në Munih. Tani pritet vetëm marrëveshja zyrtare mes dy klubeve. “Bild” raporton se Liverpool ka ofruar 20 milion euro, por gjermanët duan dyfishin e kësaj shume.
Edhe pse diferenca nuk është e vogël, palët do ia dalin të gjejnë akordin zyrtar, që do gëzonte shumë Jurgen Klopp. Trajneri gjerman e pëlqen shumë Thiagon dhe i ka kërkuar drejtuesve të klubit që të mbyllin sa më shpejt transferimin e tij në “Anfield”.
