Presidenti Ilir Meta i ka kthyer përgjigje Kryeministrit Edi Rama, i cili kundërshtoi propozimin e Presidentit që ndryshimet kushtetuese të realizohen me anë të referendumit popullor, jo nëpërmjet një parlamenti me deputetë ilegjitimë.
“Pse kaq frikë nga populli? Në Shqipëri kanë ndodhur dy referendume dhe në të dyja herët ka fituar populli. Padyshim edhe referendumin e tretë do ta fitojë populli, sepse në Republikën e Shqipërisë, sovraniteti i përket popullit dhe vetëm atij. Mos kini frikë nga populli!”, thuhet në reagimin e Tedi Blushit, Zëdhënësit të Presidentit.
Reagimi i Kreut të Shtetit erdhi pasi Kryeministri në një postim në Twitter shkruante “Ilir Meta thotë se ndryshimi i sistemit, heqja e koalicioneve, hapja e listave bëhen vetëm me referendum! Askund nuk bëhet referendum për këto çështje. Ndërsa këtu as sistemi s’do të ndryshojë, as koalicionet s’do të ndalohen, po listat do të hapen nga Kuvendi i Shqipërisë me ligj, me zakon e me karton!”
“Sa për modelin lindor, modeli i koalicionit që kemi s’është as perëndimor, as jugor, as verior dhe prandaj nuk gjendet askund në lindje a në perëndim! Modeli i ri do të jetë gjerman e plotësisht europian, koalicion tamam, me zë, figura e program, jo kosh karavidhesh pa din as iman!”, shprehej Rama.
