I dërguari i Posaçëm i Bashkimit Evropian për dialogun Kosovë-Serbi, Mirosllav Lajçak, paralajmëroi mbrëmjen e së enjtes se takimi i radhës i nivelit të lartë mes Kosovës dhe Serbisë, do të zhvillihet në fillim të muajit shtator.
Ai tha se për këtë janë pajtuar kryeministri i Kosovës, Avdullah Hoti dhe presidenti i Serbisë, Aleksandar Vuçiç, gjatë bisedimeve që kanë pasur të enjten në Bruksel.
Lajçak konfirmoi dy temat e diskutimit ishin: çështja e personave të pagjetur dhe të zhvendosur si dhe zhvillimi ekonomik.
“Rreth kësaj, është kjo çështje tejet e rëndësishme në kontekstin e pajtimit dhe me rëndësi për familjet që jetojnë në amulli tash e sa dekada,” – tha Lajçak.
Ai tha se të dyja vendet duhet të punojnë ngushtë me Kryqin e Kuq Ndërkombëtar për të zgjidhur çështjen e personave të pagjetur.
“Jam i kënaqur që pas prezantimit fillestar të qëndrimeve të dy liderët janë pajtuar që dialogu të vazhdojë në nivel të ekspertëve gjatë javës së ardhshme këtu në Bruksel”, u shpreh Lajçak.
Ky ishte takimi i parë i drejtëpërdrejtë i përfaqësuesve të Kosovës dhe Serbisë në kuadër të dialogut të Brukselit, pas më se 20 muajsh.
