Prej ditësh, radhë të gjata formohen në sheshin e vogël para portës hyrëse që të çon në sportelet e shërbimeve në Bashkinë e Tiranës.
Qytetarët presin me orë të tëra të marrin shërbim, ndërsa shumë prej tyre janë aplikues për kreditë e buta dhe afati për dorëzimin e dokumenteve për fazën e dytë mbaron ditën e nesërme. Edhe pse nga bashkia po punohet me orar të zgjatur – deri në 8 pasdite – sërish, problematikës së radhëve të gjata nuk i është dhënë zgjidhje.
Situata krijon rrezik për përhapjen e koronavirusit, në një kohë kur autoritetet shëndetësore janë shprehur se bilanci aktual i virusit ka dalë jashtë parashikimeve. Po ashtu, autoritetet jo rrallë herë kanë fajësuar qytetarët për mosrespektim të rregullave për frenimin e përhapjes së COVID, që sipas tyre, kanë çuar në shtimin e rasteve të të infektuarve. Ndërkohë, nga ana tjetër, institucionet shtetërore po krijojnë terren për përhapjen e koronavirusit të ri.
Ashtu si në Bashkinë e Tiranës, edhe te ajo e Durrësit e institucione të tjera shtetërore, janë krijuar dyndje qytetarësh. Një “non sens” kur kujton se nga autoritetet është ndaluar grumbullimi i personave. Por, mungesa e aftësisë së institucioneve për shërbime të shpejta, po çon në grumbullimin e tyre dhe shtim të rrezikut për infektimin e qytetarëve me COVID e përkeqësimin e gjendjes në vend.
Bashkia e Tiranës dështon me ofrimin e shërbimeve
Një anketë nga programi i Kombeve të Bashkuara, PNUD, realizuar në muajt e parë të vitit 2020, rezultatet e së cilës u publikuan muajin e kaluar, treguan një dështim të Bashkisë së Tiranës, në ofrimin e shërbimeve.
Anketa kishte si qëllim testimin se si reforma administrative ka ndikuar në shërbimet komunitare.
Për Bashkinë e Tiranës, e drejtuar nga Erion Veliaj, rezultati ishte zhgënjyes për sa i përket shërbimeve.
Anketa zbuloi se Bashkia Tiranë është larg së qeni bashkia më e mirë, kur vjen fjala për kënaqësinë e qytetarëve me shërbimet.
/BoldNews.al/
DENONCO