Kryeministri Edi Rama e ka cilësuar zhgënjyes në planin etik dhe të zhbalancuar në planin politik atë të zv/kryetarit të Grupit të CDU/CSU në Bungestag, Johann David Wadephul, i cili tha se nëse miratohen ndryshimet kushtetuese, atëherë Gjermania do të bllokojë hapjen e negociatave të BE-së me Shqipërinë.
Rama tha se Wadephul është një mik shumë i mirë i Lulzim Bashës, por edhe një mik i mirë i tij.
“Nuk jam në dijeni të një deklarimi të ministrit (gjerman) do ta shoh. Por nuk ndryshon. Gjermania është një pikë referimi e mbarë botës.
Deklarimi i zotit David Wadephul ishte zhgënjyes në planin etik, i zhbalancuar në planin politik. Është një mik i mirë i Lulzim Bashës dhe i imi, kam një komunikim të vazhdueshëm me të dhe e çoj për të ndihmuar në lehtësimin e marrëdhënieve politike.
Çmoj edhe faktin që është europian i palëkundur dhe vizionit për Ballkanin Perëndimor. Respekti dhe mirënjohja për çdo orë. Por mund t’ju them se është i keqinformuar lidhur me koalicionet, pasi ato nuk do të ndalohen, por do të bëhen sikundër kudo në Europë, ashtu sikundër është në Gjermani. Ajo që ne po i ofrojmë shqiptarëve është që krahas partisë të zgjedhin edhe kandidatin, dhe ti japim fund që votat e njërës parti të shkojnë te partia tjetër. Pra koalicionet nuk ndalohen, por thjesht partitë duhet të dalin me një listë kandidatësh”, tha Rama.
Kryeministri tha se Gjermania ka kërkuar një reformë elektorale bazuar në rekomandimet e OSBE/ODIHR dhe pika e parë e tyre ishte depolitizimi i komisioneve, por këtë nuk e pranoi opozita jashtëparlamentare.
“Në politikë ka një rregull, kush gabon paguan. Ikën nga Parlamenti, humbën votën dhe fjalën. Këto që janë sot në Kuvend i ka sjellë Lulzim Basha dhe drejtuesit e tjerë të opozitës jashtëparlamentare”, tha Rama.
Pjesë nga deklarata e Edi Ramës
“Kam komunikim të vazhdueshëm dhe e cmoj përkushtimin e tij për të ndihmuar në lehtësimin e marrëdhënieve politike në vend, edhe faktin që është një evropian i vendosur dhe mbështetës i vizionit të Gjermanisë për Ballkanin perëndimor. Respekti dhe mirënjohja ime për cdo orë që ia ka shpenzuar nuk ndryshon, por deklarimi i djeshëm nëncmon parlamentin e Shqipërisë duke e trajtuar si noter pa të drejtë fjalë i një marrëveshje që me patjetër duhet zbatuar padiskutim dhe këtu jemi 100% dakord edhe me votën e sotme, por ajo marrëveshje nuk mund të jetë kusht për të ndaluar parlamentin të shkojë përtej saj duke demokratizuar më tej zgjedhjet, ky është nxitimi institucional.
Tani dua të merrem me thelbin për tu sqaruar me të gjithë qofshin shqiptarët që mirëpresin hapjen e listave, qoftë edhe partnerët e më vjen keq për faktin se në deklarimin e djeshëm, flitet për vënien në pikëpyetje të perspektivës evropiane të vendit, ndërkohë që qoftë Bundestagu, qoftë KE nuk i kanë vënë kusht vendit të bëjë të lumtur Bashën, as ndonjë marrëveshje jashtëparlamentit me partitë që e braktisën e as të marrë pëlqimin e Bashës për nismat që parlamenti ndërmerr në cilësinë e ushtruesit të vullnetit të shqiptarëve. Shqipëria nuk gjykohet mbi bazën e anësive politike apo mbi bazën e fjalëve, por duhet të gjykohet dhe jam i bindur se kështu do jetë kur mjegulla të jetë shpërndarë mbi bazën e fakteve. Unë nuk pendohem që ne e pritëm në pafundësi opozitën jashtëparmentare në tryezë, e që më në fund bëmë në marrëveshje”.
