Një punonjës policie u plagos me armë zjarri rreth orës 14:30 të ditës së sotme. Ngjarja ka ndodhur në fshatin Bujan, Tropojë.
Përmes një njoftimi zyrtar, policia thotë se plagosja nuk ka lidhje me detyrën e efektivit.
Ai është qëlluar me armë zjarri pistoletë nga komshiu i tij, pas një konflikti pronësie.
“Më datë 15.07.2020, rreth orës 14:30, në fshatin Bujan, si pasojë e një konflikti të çastit për motive pronësie, shtetasi R. B., në afërsi të banesës, ka plagosur me armë zjarri pistoletë, jashtë rrezikut për jetën, komshiun e tij shtetasin A. H., punonjës policie i Komisariatit të Policisë Tropojë, i cili në momentin e ngjarjes ishte jashtë shërbimit dhe ngjarja s’ka lidhje me detyrën.
Shërbimet e Policisë janë nisur menjëherë në drejtim të vendit të ngjarjes për të bërë të mundur kapjen dhe arrestimin e autorit.
Njëkohësisht është ngritur grupi hetimor, i cili po shkon në vendngjarje, për zbardhjen dhe dokumentimin e plotë të rrethanave të ngjarjes”, thuhet në njoftimin zyrtar.
