Katër persona kanë humbur jetën në 24 orët e fundit në spitalin Infektiv në Tiranë, duke e çuar në 101 numrin e personave që nuk kanë mundur të fitojnë betejën me Covid-19.
Pacientja më e re që ka humbur jetën është një 21-vjeçare, e cila ka pësuar tromboemboli, ndërsa ishte e shtruar në spitalin Infektiv. Gjendja e saj ishte rënduar, duke detyruar stafin mjekësor që ta kalojnë në terapi intensive dhe më pas në intubim. 21-vjeçarja vuante nga sindromi metabolik.
Viktima e dytë është një grua nga Kruja, nënë e 7 fëmijëve, e cila gjithashtu ishte në intubim.
Dy viktimat e tjera janë një 56 vjeçar dhe një 67 vjeçar nga Tirana.
Gjendja në spitalin infektiv vijon të mbetet e rëndë, ku 4 pacientë ndodhen në intubim, në gjendje të rëndë shëndetësore.
Detajet nga Ministria e Shëndetësisë:
“Situata paraqitet e rënduar në spitalin infektiv, ku janë shënuar 4 humbje jete në 24 orët e fundit.
Mëngjesin e sotëm ka ndërruar jetë një vajzë e re 21 vjeçare, e cila ndodhej në terapi intensive e intubuar, si pasojë e simptomave të rënda të Covid19.
Gjendja e saj u rendua në mënyrë të menjëherëshme si pasojë e tromboembolisë fulminante dhe pavarësisht përpjekjeve maksimale të stafit mjekësor, e reja që vuante nga sindromi metabolik, nuk ka arritur të mbijetojë.
Gjatë 24 orëve të fundit e kanë humbur betejën me sëmundjen edhe një qytetare 49 vjeçare nga Kruja, e intubuar në gjendje të rëndë prej 11 ditësh dhe dy qytetarë, 56 dhe 67 vjeç, nga Tirana të intubuar, të cilët nuk e kanë fituar dot betejen me virusin e rrezikshëm, megjithë përpjekjet e mëdha qe po bën stafi mjekësor.
Ministria e Shëndetësisë dhe Mbrojtjes Sociale, u shpreh ngushëllimet familjarëve”.
Në 24 orët e fundit ka pasur një rritje të numrit të personave që kërkojnë ndihmë mjekësore të stabilizuar.
