Dy persona kanë humbur jetën si pasojë e Covid-19 në 24 orët e fundit, duke e çuar në 95 numrin e viktimave nga koronavirusi në Shqipëri.
Viktimat janë një burrë nga Shkodra dhe një grua nga Tirana.
“Në 24 orët e fundit, nuk e kanë fituar dot betejën me sëmundjen 2 qytetarë: Një 70-vjeçare nga Tirana dhe një pacient 66-vjeçar nga Shkodra, me sëmundje bashkëshoqëruse. Ministria e Shëndetësisë dhe Mbrojtjes Sociale u shpreh ngushëllime familjarëve të të ndjerëve“, tha Eugena Tomini nga ISHP.
Ministria e Shëndetësise ka njoftuar se në 24 orët e fundit ka shtim të pacientëve të shtruar në spitalin Infektiv.
Aktualisht janë të shtruar në spital 85 pacientë, 10 janë në terapi intensive dhe 4 prej tyre janë të intubuar, në gjendje të rëndë.
Spitali Infektiv ka 120 shtretër dhe numri i personave që po kërkojnë ndihmë mjekësore është shumë më i lartë se periudha që konsiderohej si piku i pandemisë.
