Këshilli i Legjislacionit dhe Komisioni i Ligjeve ka vijuar diskutimet lidhur me ndryshimet e kërkuara nga ajo që njihet si opozita parlamentare për ndryshimet Kushtetuese lidhur me hapjen e listave, pragun elektoral dhe ndalimin e koalicioneve parazgjedhore.
Por duket se opozita parlamentare nuk ka një qëndrim unik lidhur me 3 kërkesat, dy prej të cilave janë pragu elektoral dhe ndalimi i koalicioneve.
Deputeti Korab Lita tha se pragu 5 % dhe ndalimi i koalicioneve nuk është demokratik. Sipas tij, pragu elektoral duhet të jetë 2 %, duke mos penalizuar në këtë mënyrë partitë e reja.
E ndërsa më parë vetë deputetët e opozitës parlamentare kërkuan një prag prej 5 %, më pas propozuan pragun 3 %, ndërsa sot del propozimi i tretë me 2 %.
Në lidhje me këtë Klotilda Ferhati nga PS deklaroi se pragu 2% i duket i ulët, por kjo duhej diskutuar.
“Morëm një propozim tjetër në fillim. Të ulemi të gjithë bashkë si relatorë dhe ekspertë t’i diskutojmë pse mbërritëm në këtë shifër dhe jo në një tjetër. Të mblidhemi të 4 relatorët dhe t ja paraqesim me shkrim formulën finale anëtarëve të komisionit“, tha ajo.
Gjithashtu koalicionet parazgjedhore duket se ndajnë deputetët e opozitës parlamentare, që po shfaqen të paqartë. Në njërën anë kanë zyrtarizuar kërkesën për ndalimin e tyre, kërkesë e firmosur nga mbi 28 deputetë, dhe në anën tjetër ka një rrjedhje në qëndrimin e tyre.
