Policia e Durrësit ka arrestuar dy persona, ndërsa një tjetër u shpall në kërkim, me dyshimin se kanë vjedhur disa banesa në qytetin bregdetar.
Policia e Durrësit njoftoi se në kuadër të operacionit policor të koduar “Periferia”, ndaloi D. S, 18 vjeç dhe H.Q, 20 vjeç, banues në Manzë dhe shpalli në kërkim K.N, 19 vjeç, banues në Rrushkull.
Dyshohet se të tre në bashkëpunim me njëri-tjetrin, në një periudhë 3-mujore kanë kryer 12 vjedhje në banesa, në fshatrat Shkafanë, Rrotull, Armathë, Radë, Kuçok, Hamall, Kërtushaj, Rrushkull, ku kanë marrë orendi shtëpiake, vlera monetare dhe vegla pune.
Materialet i kaluan Prokurorisë së Rrethit Gjyqësor Durrës, për veprën penale “Vjedhja”.
