Mijëra njerëz protestuan në Beograd kundër njoftimit të Presidentit serb Aleksandër Vuçiç, për rikthim të ndalim-qarkullimit, gjatë fundjavës së kaluar për shkak të koronavirusit.
Policia përdori gaz lotsjellës ndaj protestuesve, të cilët kaluan kordonin e policisë para hyrjes në ndërtesën e Parlamentit serb.
Në rrjetet sociale ende qarkullojnë video në të cilat shihet dhuna brutale e milicisë serbe ndaj qytetarëve.
Siç shihet edhe në këtë video një grup i madh policësh serbë shtrijnë në tokë një protestues duke e qëlluar brutalisht me shkopinj gome deri sa e lënë pa ndjenja në mes të rrugës.
Policët e tjerë të cilët janë duke kaluar patrullë me makinat e tyre vetëm sa e largojnë protestuesin pa ndjenja pasi ai u ka zënë rrugën.
Presidenti Aleksandër Vuçiç e cilësoi situatën në kryeqytetin serb “alarmante” dhe “kritike” por vendosi që të tërhiqej nga masat shtrëngues për shkak të koronaviriusit.
