Dy humbje jete dhe 90 raste të reja me COVID-19 u shënuan në 24 orët e fundit, informoi Ministria e Shëndetësisë.
43 janë të shëruarit. Përveç rasteve të reja, në krahasim me një ditë më parë, është rritur dhe numri i të infektuarve aktivë, në 1318.
Rënie e lehtë ndërkohë në shtrimet në spitale. Te Infektivi, aktualisht janë të shtruar 81 pacientë – 11 pacientë në terapi intensive në gjendje serioze dhe 5 prej tyre janë të intubuar në gjendje të rënde.
90 raste të reja është shifra më e lartë e shënuar në vendin tonë – sot dhe në datën 3 Korrik.
2 humbje jete
“Një 81-vjeçar nga Shkodra dhe një 63-vjeçar nga Elbasani, të shtruar prej disa ditësh në spitalin infektiv në gjendje të rënduar, nuk kanë mundur të mbijetojnë, megjithë përpjekjet e stafit mjekësor”, tha Flutura Beqo nga Ministria e Shëndetësisë dhe Mbrojtjes Sociale.
Sipas MSH, 85 persona e kanë humbur betejën me COVID në vend.
Rastet e reja
Ajo bëri me dije se, gjatë 24 orëve të fundit janë kryer 420 testime për të dyshuar të prekur me COVID19, nga të cilat janë konfirmuar 90 raste pozitive.
Shpërndarja gjeografike e rasteve është si vijon: 36 raste në Tiranë, 15 në Durrës, 11 në Vlorë, nga 8 raste në Kukës, Krujë, 4 në Kurbin, 3 në Elbasan, 2 në Lushnje, nga 1 rast në Lezhë, Kamëz, Dibër.
Situata në spital dhe të shëruarit
Sipas MSH, aktualisht janë të shtruar 81 pacientë në spital, 11 pacientë janë në terapi intensive në gjendje serioze dhe 5 prej tyre janë të intubuar në gjendje të rënde. Në 24 orët e fundit janë shëruar 43 qytetarë, duke e çuar në 1875 numrin e të shëruarve që nga fillimi i epidemisë. Në vendin tonë aktualisht janë 1318 persona aktivë me COVID19, kryesisht në Tiranë, Shkodër, Krujë, Durrës.
Apeli
Ministria e Shëndetësisë i rikujton bizneset se duhet të respektojnë me rigorozitet protokollet për të ruajtur shëndetin e punonjësve dhe qytetarëve: Mbajtja e maskës është e detyrueshme në ambientet e mbyllura.
“Ministria e Shëndetësisë dhe Mbrojtjes Sociale i rikujton bizneset se duhet të respektojnë me rigorozitet protokollet për të ruajtur shëndetin e punonjësve dhe qytetarëve. I drejtohemi me një lutje të gjithë qytetarëve: Tregohuni të kujdesshëm, respektoni distancimin fizik, higjienën personale. Mbajtja e maskës në ambiente të mbyllura është e domosdoshme. Mbani maskën kudo ku nuk mund të ruani distancën fizike, për të mbrojtur veten dhe të tjerët, për të parandaluar përhapjen e infeksionit. Izolohuni nëse keni shenja të sëmundjes dhe telefononi në numrin unik të Urgjencës Kombëtare, 127. Për informacion në lidhje me COVID19 dhe këshillim psikologjik, ju lutemi, telefononi në linjën e gjelbër 0800 40-40”, tha Beqo.
Shpërndarja gjeografike e rasteve aktive sipas qarqeve, referuar MSH
- Tiranë 529
- Durrës 229
- Shkodër 169
- Vlorë 120
- Lezhë 65
- Fier 41
- Kukës 40
- Elbasan 34
- Korçë 32
- Berat 24
- Dibër 18
- Gjirokastër 17
COVID-19 – Statistika (10 Korrik 2020), sipas MSH
- Testime totale 31513
- Raste pozitive 3278
- Raste të shëruara 1875
- Raste Aktive 1318
- Humbje jete 85 (Qarku Tiranë 46, Durrës 13, Fier 5, Vlorë 2, Shkodër 13, Kukës 1, Elbasan 3, Lezhë 1, Berat 1)
