Pas konfirmimit se dy futbollistët e Partizanit, Dejan Boldor dhe Besnik Ferati, ishin prekur nga coronavirusi, klubi kryeqytetas ka marrë menjëherë masat për të futur në karantinë mbrojtësin rumun dhe mesfushorin shqiptar nga Maqedonia e Veriut.
Ndërkohë kur jemi disa orë para derbit të kryeqytetit, drejtuesit e Partizanit po vijojnë të ndjekin me përpikëri protokollin e dakordësuar nga ISHP dhe FSHF për menaxhimin e situatave të tilla në kampionatin shqiptar.
Kështu në orët e vona të mbrëmjes së djeshme, specialistë të ISHP-së u bënë tamponët të gjithë futbollistëve dhe pjesëtarëve të stafit të skuadrës së Partizanit dhe vetëm ditën e sotme pritet të dalin përgjigjet.
Protokolli i nënshkruar përpara rifillimit të sezonit, parashikon se çdo lojtar që do të rezultojë pozitiv ndaj COVID-19, do të duhet t’i nën shtrohet karantinës, ndërsa pjesa tjetër do të grumbullohen nën masa të larta higjiene e kujdesi, për të qenë gati për ndeshjen e radhës.
Duke pasur këtë parasysh, mund të thuhet me siguri se zhvillimi i derbit të kryeqytetit nuk është aspak në rrezik, ndërsa trajneri Sormani do të duhet të bëjë pa Boldor, Feratin dhe ndonjë tjetër që mund të rezultojë pozitiv gjatë testit të kryer mbrëmjen e djeshme.
DENONCO