Kryetarja e Autoritetit për Dosjet e Sigurimit, Gentiana Sula, sqaroi sot në studion e Syri Tv, nëse Martin Camaj, ka qenë ose jo bashkëpunëtor i Sigurimit të Shtetit.
Sula ka paraqitur në emision një fashikull pune me emrin e Martin Camaj, për të cilën thotë që nuk është dosja e një bashkëpunëtori, por e survejimit që Sigurimi i Shtetit i ka bërë Camajt për ta rekrutuar si bashkëpunëtor.
“Dosja është deklasifikuar vitin e kaluar në janar. Nuk bëhet fjalë për dosje bashkëpunimi, por për një fashikull pune.
Subjekti është 2A, që do të thotë se ishte bërë gati për arrest. Dosja ka 22 faqe. Duhet lexuar me shumë kujdes.
Martin Camaj ka qenë shumë inteligjent, ka pasur një shkollim të mirë.
Sigurimi është përpjekur t’i vrasë moralisht. E thashë edhe njëherë që është dosje survejimi. Duhet të kuptojmë që një dokument sigurimi është një dokument i një policie politike, militare, e cila funksiononte mbi ligjin.
Një policie që ka pasur jetën e njerëzve në dorë. Ka pasur një qëllim, i cili ishte përpunimi. Në dokument nuk thuhet se kush është personi”, tha ajo.
