Të ardhurat e kompanive të sigurimeve u rritën me 9.5 për qind në tetë muajt e parë të vitit krahasuar me të njëjtën periudhë të vitit të kaluar, teksa shqiptarët po paguajnë gjithmonë e më shumë për të siguruar jetën, pronën, apo dhe automjetet e tyre.
Të dhënat zyrtare tregojnë se për periudhën janar-gusht, qytetarët shqiptarë paguan mbi 180 milionë euro prime, ndërsa numri i kontratave të sigurimit arriti në 1 milionë e 116 mijë duke shënuar një rritje me 6.12% krahasuar me Janar-Gusht 2024.
Sipas të dhënave, tregu dominohet nga sigurimet e Jo-Jetës, të cilat zënë mbi 91.5 për qind në vëllimin e përgjithshëm të primeve. Ndërkohë, primet e shkruara bruto të sigurimit vullnetar zunë 38.16%, ndërsa ato të sigurimit të detyrueshëm ishin 61.84% të totalit të tregut.
Por ndërsa të ardhurat u zgjeruan me gati 10 për qind, dëmet e paguara nga shoqëritë e sigurimeve shënuan rënie. Sipas AMF, pagesat e dëmeve gjatë janar – gusht 2025 ishin rreth 55 milionë euro duke rënë me 2.27% krahasuar me janar – gusht 2024.
Pjesa më e madhe e dëmeve të paguara bruto mbeten ato të sigurimit sigurimit motorik me rreth 42 milionë euro, apo 76.7 e totalit të dëmeve të paguara bruto. Deri në gusht të këtij viti kompanitë e sigurimeve paguan afro 42 mijë dëme me një mesatare prej 1 mijë euro për ccdo rast dëmi të paguar.
Nga 1 janari i këtij viti nisi zbatimi i skemës së re të sigurimit të automjeteve, bonus-malus, që përcakton një përllogaritje të re të primit të sigurimit mbi bazën e faktorëve të riskut. Rregullorja e re parashikon një rritje të çmimit të primit të sigurimit për individët që janë të rinj në moshë, që kanë pak eksperiencë në drejtimin e një automjeti me fuqi të madhe motorike të regjistruar në qarkun e Tiranës, që do të kenë historik aksidentesh, ndërsa për ata që nuk do të kryejnë aksidente ka një ulje të çmimit të primit të sigurimit.
