Ministria e Brendshme, 1.3 mln euro tendera kompanive të lidhura me 3 të dënuar për korrupsion

Nga BoldNews.al

Kompanitë “Dajti Park 2007”, “Nelsa” dhe “4 S”, të lidhura drejtëpërdrejtë me tre të dënuar për korrupsion në tendera publikë në vitin 2018, janë shpallur fitues të rreth 1.2 milionë eurove në tenderat e zhvilluar gjatë 4 muajve të fundit nga Agjencia e Blerjeve të Përqëndruara, një strukturë në varësi të Ministrit të Brendshëm, Sandër Lleshaj.

Të dhënat zyrtare të Agjencisës së Prokurimit Publik tregojnë se 3 kompanitë, të cilat operojnë në veprimtarinë e furnizimit ushqimor, kanë fituar në total 16 procedura të prokurimit publik, të zhvilluara gjatë periudhës Shkurt-Qershor 2020.

Pronarët themelues të këtyre shoqërive private, Ylber Kalaja, Nexhmi Balla dhe Shemsi Sinani u arrestuan në vitin 2016 dhe u dënuan dy vjet më pas nga Gjykata e Apelit për Krimet e Rënda, për korrupsion në tenderat e zhvilluar nga Drejtoria e Përgjithshme e Burgjeve.

Pas vendimit gjyqësor, të tre pronarët vepruan në mënyrë të ngjashme-ata ua kaluan me dhurim kompanitë djemve të tyre, një formë që u lejoi të merrnin pjesë në tenderat publikë.

Ndërkohë që ligjërisht përfshirja e tre kompanive në garë për fonde publike nuk duket se nuk ka problem, megjithatë Ministria e Brendshme po përcjell mesazhin e gabuar se shoqëritë e përfshira në korrupsion mund të rehabilitohen shumë shpejt, mjafton që pronësia e tyre të kalojë në dorë të familjarëve të dënuar për korrupsion.

Tenderat e Ministrisë së Brendshme

Agjencia e Blerjeve të Përqëndruara, pjesë e Ministrisë së Brendshme, ka zhvilluar gjatë muajve të fundit një seri tenderash për furnizim me ushqime, në procedura të miratuara paraprakisht ose ato që u nxitën nga pandemia “Covid-19”.

“Boldnews.al” ka verifikuar të dhënat zyrtare lidhur me tenderat e zhvilluar nga Agjencia e Blerjeve të Përqëndruara dhe të fituar nga “Dajti Park 2007”, “Nelsa” dhe “4 S”.

Të dhënat tregojnë se “Dajti Park 2007”, ka fituar dy tendera të zhvilluar nga Agjencia e Blerjeve të Përqëndruara në periudhën Mars-Qershor 2020, me fond limit mbi 68 milionë lekë të reja.

“Dajti Park 2007” është themeluar nga administratori aktual i komunës Dajt, Kujtim Qefalia. Pasi ai u zgjodh kryetar i komunës Dajt në vitin 2007, Qefalia ia kaloi kompaninë bashkëpunëtorit të tij, Ylber Kalaja.

Megjithëse ka shumë të dhëna indirekte se Kujtim Qefalia është pronari “de facto” i kompanisë “Dajti Park 2007”, të dhënat zyrtarë tregojnë se ajo tashmë është në pronësi të vëllait të tij, Lulzim Qefalia dhe Desart Kalaja, djalit të Ylber Kalaja.

Kompania “Nelsa”, e themeluar nga Nexhmi Balla dhe aktualisht në pronësi të vajzës së tij, Elsa Kamberi (Balla) ka fituar 6 procedura tenderuese të zhvilluar në muajt e fundit nga Agjencia e Blerjeve të Përqëndruara, me fond limit rreth 17 milionë lekë të reja.

Ndërsa kompania “4 S”, nën pronësinë e Xhino Sinani, djali i biznesmenit Shemsi Sinani, ka fituar 8 tendera të zhvilluar nga agjencia në varësinë e ministrit të Brendshëm, për një total prej rreth 60 milionë lekë të reja.

Tendera-arrestime-tendera

Në 11 Korrik 2016, Policia e Shtetit arrestoi biznesmenët Ylber Kalaja, Nexhmi Balla dhe Shemsi Sinani, pasi Prokuroria për Krime të Rënda kishte zbuluar një rast korrupsioni në tenderat e ushqimeve për Drejtorinë e Përgjithshme të Burgjeve, ku ishin përfshirë kompanitë e tyre “Vllaznimi” (sot, “Dajti Park 2007”); “Nelsa” dhe “M.B Kurti” (sot “Sinan Trading”.

LEXO EDHE  Emrat/ Diplomacia shqiptare “çorap”, emërimet e Gent Cakaj, “qoka” për Rilindjen e Soros

Së bashku me biznesmenët, me urdhër të Prokurorisë u arrestuan në atë kohë edhe drejtori i përgjithshëm i Burgjeve, Artur Zoto dhe zëvendësi i tij, Iljaz Labi.

Pas arrestimeve, biznesmenët Kalaja, Balla dhe Sinani morën masat për të siguruar vijimësinë e kompanive të tyre, duke ua kaluar administrimin personave të afërt me ta.

Ylber Kalaja, nga ambjentet e paraburgimit, vendosi që administrator i “Vllaznimi” (Dajti Park 2007” të ishte ortaku i tij, Lulzim Qefalia, vëllai i administratori aktual të Dajtit, Kujtim Qefalia dhe deputetit të Partisë Socialiste, Xhemal Qefalia.

Biznesmeni Shemsi Sinani u kaloi djemve të tij, Taulant, Xhino dhe Ledion Sinani, administrimin e kompanisë së tij “M.B Kurti”, (“Sinani Trading”).

Thuajse në të njëjtën kohë, një prej djemve të biznesmenit Sinani, Xhino, regjistron shoqërinë “4 S”. Kjo kompani ka objekt identik me biznesin e babait të tij dhe gjenden afërsisht në të njëjtën adresë, në Lushnje.

Disa kohë më vonë, edhe Nexhmi Balla i kaloi të drejtat e administrimit të kompanisë “Nelsa” vajzës së tij, Elsa Kamberi (Balla).

Në Nëntor 2018, Gjykata e Apelit për Krime të Rënda shpalli fajtor biznesmenët Kalaja, Balla e Sinani për “korrupsion pasiv”, duke i dënuar me nga dy vjet burgim, të konvertuar në shërbim prove.

Bashkë me ta u dënuan edhe dy biznesmenë të tjerë, si edhe ish-zv.drejtori i Përgjithshëm i Burgjeve, Iljaz Labi. Ndërsa ish-titullari, Artur Zoto, u shpall i pafajshëm.

Vendimi i dënimit për korrupsion i ndalonte automatikisht kompanitë e 3 biznesmenëve për të marrë pjesë në tendera publikë.

Për këtë arsye, ata vepruan në të njëjtën mënyrë, për t’i siguruar shoqërive private përfitimin nga fondet shtetërore-u dhuruan kompanitë fëmijëve të tyre.

Në 27 Nëntor 2018, vetëm pak ditë pas shpalljes fajtor, biznesmeni Nexhmi Balla, i dhuron bashkëshortes së tij, Lizeta Balla, të gjithë aksionet e kompanisë “Nelsa”. Kjo e fundit, në Maj 2020 ia dhuron kompaninë vajzës së tyre, Elsa Kamberi (Balla).

Biznesmeni Ylber Kalaja, në 12 Dhjetor 2018, vetëm dy javë pas vendimit përfundimtar të dënimit, i dhuron kompaninë e tij djalit, Desart Kalaja dhe bashkëpunëtorit Lulzim Qefalia, me nga 50 përqind të aksioneve secilit.

Në fillim të janarit 2019, edhe biznesmeni Shemsi Sinani ndjek rrugën e kolegëve të tij. Ai i dhuron kompaninë “Sinani Trading” (ish-M.B.Kurti”) djalit të tij, Ledion Sinani.

Kompania “Sinani Trading” nuk rezulton të ketë fituar tendera të zhvilluar nga Agjencia e Blerjeve të Përqëndruara, por, gjithësesi, ka qenë rezultativ në procedura të prokurimit publik të organizuara nga institucione të ndryshme.

Ndërkohë, familja Sinani rezulton e suksesshme në tenderat e zhvilluar nga Ministria e Brendshme, nëpërmjet Agjencisë së Blerjeve të Përqëndruara, me kompaninë “4 S”, në pronësi të djalit tjetër të Shemsi Sinanit, Xhinos.