Sapo janë mbyllur dy ndeshjet hapëse të javës së 32-të në Kategorinë Superiore.
Takimi mes Laçit dhe Flamurtarit është mbyllur me rezultatin 2-1 në favor të kurbinasve. Të tre golat e kësaj sfide, u shënuan në pjesën e dytë të sfidës.
Fillimisht, ishte Xhixha ai që fiton një penallti në minutën e 50-të të sfidës dhe Kyrian Nwabueze, mori përsipër ekzekutimin e saj ku nuk gaboi në ekzekutim. Flamurtari reagoi duke barazuar rezultatin në minutën e 63-të me anë të Hoxhës.
Gjithsesi, Laçi ktheu gjithçka në favor të vet me anë të Turkajt në minutën e 76-të. Ky sukses, i ngjit djemtë e Cungut në kuotën e 52 pikëve, katër më pak se Kukësi i vendit të dytë.
Nga ana tjetër sfida ndërmjet Luftëtarit dhe Vllaznisë u mbyll 0-1 për miqtë. Ndeshja e nisur me 10′ vonesë për shkak të mungesës së ambuilancës në stadium është vendosur nga një gol i Silvio-s në minutën e 40-të të pjesës së parë.
Një rezultat mjaft i mirë ky për Vllazninë, skuadër e cila po lufton për të dalë nga zona e playout-it.
