Shoqata e Shoqërive të Transportit Publik zbulon për mediat se në një takim me kreun e Bashkisë Tiranë kanë rënë dakord për pjesën e plotësimit të kërkesave që varen nga bashkia.
Të hënën me shumë mundësi do të nisë aktiviteti i transportit publik për linjat që nuk kanë filluar ende.
Ndërsa punonjësit e transportit publik, kanë dalë sot në protestë për të kërkuar pagën e dytë të luftës që u është premtuar nga qeveria.
“Qeveria paguan deputetët e rrugës, paguan karburant për ta edhe në kohë pandemie kur ata kanë qëndruar në shtëpi. Shoqata të bëjë çfarë të dojë, unë nuk filloj punën. Kemi familjet pa bukë. Shoqata të punojë vetë. Ne duam pagën e dytë”- shprehet një prej punonjësve.
Të gjithë në unison kanë një kërkesë të vetme; pagën e dytë të luftës sepse kanë që në mars pa punë dhe pa asnjë të ardhur.
Teksa burime pranë shoqatave kanë rënë dakord për të nisur punën ditën e hënë, punonjësit nuk pranojnë të nisin pa marrë pagën e dytë të luftës.
“Jo, nuk ka asnjë kontradiktë këtu. Punonjësit janë në gjendje të mjerueshme. Nëse bizneset kanë ndonjë kursim për të mbijetuar, ata jo. Nuk mund të jetojnë pa asnjë të ardhur. Atyre u është premtuar paga e luftës dhe Ministria e Financave të zbatojë premtimin që të nisim nga puna të hënën. Java tjetër do të ketë shumë zhvillime në sektorin tonë”, u shpreh një burim pranë njërës prej shoqatave të Transportit Publik.
Autobusët e transportit publik kanë patur përherë problematika; që nga tejmbushja, mosfunksionimi i ventilimit dhe kondicionimit etj. Nëse transporti publik nis të hënën, siç bënë me dije burime pranë shoqatave të transportit, shoqëritë e transportit duhet të reflektojnë dhe t’u ofrojnë një shërbim dinjitoz qytetarëve.
