Presidenti i UEFA-s, Aleksander Ceferin, thotë se nuk ka asnjë kërcënim për përfundimin e Ligës së Kampionëve (2019-2020) sipas planit të rishikuar, me një fazë finale që do të zhvillohet në Lisbonë, pavarësisht shtimit të rasteve me Covid-19 në kryeqytetin portugez.
Pandemia bëri që kompeticioni kryesor i klubeve europiane të futbollit të pezullohej në mars, ndërsa tani është revizionuar pjesa e mbetur, që do të luhet në formën e një mini-turneu në Lisbonë, muajin gusht.
Sidoqoftë, është bërë e ditur se 19 lagje në veri të kryeqytetit portugez do të kthehen në karantinë, me rregulla të rrepta izolimi, duke i kufizuar grumbullimet në vetëm pesë persona.
Ceferin nuk frikësohet nga precipitimi i mundshëm i situatës së koronavirus atje. Ai tha se ka folur me kryeministrin portugez, Antonio Costa, dhe presidentin e federatës së futbollit atje, Fernando Gomes, të martën, duke analizuar edhe situatën:
“Unë do të doja të falënderoja kryeministrin portugez, Antonio Costa, për përkushtimin e tij në këtë projekt. Po ashtu, inkurajoj punën që ai po bën së bashku me Federatën Portugeze të Futbollit për të siguruar që Portugalia të zhvillojë një mini-turne të suksesshëm. Jam i sigurt se me bashkëpunimin e vazhdueshëm midis të gjithë palëve të interesuara, ne do ta përmbyllim sezonin në një mënyrë pozitive në Lisbonë. Nuk ka nevojë për një plan B”.
